BACOLOD CITY – Nagakanugon si anay Bacolod City Mayor Monico Puentevella sa temprano pa nga pagkaguba sang imahen ni anay Councilor Carl Lopez bilang isa ka politiko.
Ini ang reaksyon ni Puentevella nga amo ang nagpasaka sang kaso nga Grave Misconduct kag Usurpation of Authority or official function batok kay Lopez.
Ang panumbungon may angot sa pagmandu ni Lopez sa Traffic Management Unit (TMU) nga hatagan sang exemption sa ginapatuman nga truck ban ang madamo nga delivery vans nga ginapanag-iyahan sang pribado nga mga kompaniya.
Suno kay Puentevella, nagakanugon ini bangud huben pa si Lopez apang daku na nga kaso ang iya ginaatubang sa Sandinbayan nga posible mahulog sa ulihi sa mabug-at nga penalidad.
Apang ginpabutyag sini nga nangin adbenturero si Lopez sa pagmandu sini sa TMU samtang ang amo nga otoridad ang ginauyatan sang alkalde kag ini ang ginrespetar kuntani sang anay konsehal.
Dugang pa ni Puentevella, ang nasambit nga aktwasyon ni Lopez ang indi maayo nga panghimanwa sang isa ka bataon pa nga politiko.
Nahibaluan nga ginpasaka na sa Sandiganbayan ang kaso nga Usurpation of Authority or Official Function samtang bangud wala na sa serbisyo sa gobyerno si Lopez, indi na epektibo sa iya ang dismissal order sang Ombudsman, apang kinahanglan sini magbayad sang multa nga katumbas sa isa katuig sini nga sweldo.
