Ginpakigbahin sang city director sang Bacolod City Police Office nga ang pagpatigayon sang drug buybust operation ang intelligence-driven kag nagakinahanglan sang nagakaigo nga tion antes pa ini mapatigayon.
Sa interview sang Bombo Radyo Bacolod kay Police Col. Joeresty Coronica, ang kampanya batok sa illegal nga druga ang indi madali bangud may mga proseso nga kinahanglan sundon kaangay lamang sang pagkumpirmar nga ang ginatudlo nga naga-engage sa iligal nga transaksyon ang matuod.
Suno kay Coronica, kabahin sa tikang nga ginahimo sang mga kapulisan agud nga makumpirmar ang impormasyon nga nabaton amo ang pag-establisyar sang masaligan nga asset.
Dugang pa sini nga dako man nga pagpanghangkat sa mga kapulisan sa kampanya batok sa illegal nga druga amo ang madamo nga alagyan halin sa Mindanao ukon Cebu.
Suno sa city director, ang iligal nga druga ang indi man nagikan sa ciudad sang Bacolod bangud mahimo nga ini ang nakasulod sa ciudad paagi sa mga puerto kag iban pa nga alagyan.
Gani panugyan sini sa mga kapulisan nga apisar nga madamo sang pagpanghangkat sa kampanya batok sa illegal nga druga, magpadayon lamang nga agresibo sa paghimo sang mga tikang agud nga madakpan na ang mga nagaintra sa illegal nga buluhaton.
