Ginarespeto sang Bacolod City Government ang imbestigasyon sang Senado sa Prime Water.
Nahibaluan nga ginpanawagan ni Senate Deputy Minority Leader Risa Hontiveros ang pagpatigayon sang Senate investigation sa joint venture agreements sa tunga sang water districts kag private companies, bangud pila diri ang natukiban sang Commission on Audit (COA) nga “disadvantageous”.
Ginpahayag ni Hontiveros nga nagapanawagan ini nga maimbestigaran ang reklamo sang mga pumuluyo kalakip na ang Bacolod City nga nagadamo na, batok sa private concessionaire nga PrimeWater Infrastructure Corp.
Sa interview sang Bombo Radyo Bacolod kay Bacolod City Mayor Alfredo “Albee” Benitez, nagakatabo sa karun ang kada lima ka tuig nga pagreview sang kontrata.
Suno sa alkalde nagnubo man ang water table bangud sa mainit nga tiyempo.
Suno diri kinahanglan man nga iduso ang mga bulk water supplier agud nga mapadasig ang paghatag sang supply sang tubig.
Samtang ginpahayag sang Chair sang Committee on Energy and Public Utilities sa Sangguniang Panlungsod nga bantayan ang mangin resulta sang senate inquiry.
Suno kay Councilor Claudio Jesus “Kalaw” Puentevella, nagapadayon ang ila nga koordinasyon sa Prime Water bangud ang mga Bacolodnon ang nagakinahanglan sang maayo nga serbisyo bangud ang tubig ang tuman ka importante para sa adlaw adlaw nga paggawi sang mga pumuluyo.
