BACOLOD CITY — Nabuhin-buhinan ang kahangawa sang pamilya sang overseas Filipino worker sa Kuwait nga ginapahayag ginpriso sang iya amo sa kwarto kag tubtob subong indi na makontak.
Ini matapos gin-atender na sang Overseas Welfare Workers Administration (OWWA) ang kaso sini.
Nagpadulong kahapon sa OWWA Bacolod Office si Lilibeth Hizon sa bulig man sang Bombo Radyo Bacolod agud nga idangop ang problema sang iya pakaisa nga si Charry Cervantes Deniega, 42-anyos sang Brgy. Binagyuhan, Escalante City nga humalin pa sang Sabado indi na makontak matapos nga ginpriso sang iya amo sa iya nga kwarto nga wala pa sang pagkaon.
Suno kay Hizon, gin-interview na siya sang OWWA angot sa sitwasyon sang iya pakaisa nga domestic helper kag kun ano ang luyag nila nga matabo diri.
Nagpadala naman sang sulat ang OWWA Bacolod sa agency ni Deniega kag mismo sa OWWA Central Office agud nga mahatagan pagtamod ang iya nga kaso.
Luyag gid ni Hizon nga mahibaluan kun anu na karon ang kahimtangan sang iya pakaisa sa Kuwait kag ma-rescue ini.
