Arestado ang isa ka persona matapos gin-alegar nga ginhostage ang apat sini ka himata sa sulod sang duha ka kwarto sa isa ka balay sa Barangay Estefania, ciudad sang Bacolod sang Sabado.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, indi makagwa ang apat ka persona bangud ginsira man sang suspek ang gate gani nagpanago nalang ang mga ini sa kwarto.
Suno kay Depasucat, gintinguhaan nga maghagan hagan ang tensyon paagi sa pag-estorya sa suspetsado apang nagrun-amok kag wala ini nagapamati kag nagpadayon lang sa pagpamilit nga makasulod sa kwarto paagi sa pagguba sang pwertahan nga may dala nga martilyo kag kutsilyo.
Suno diri, nakakuha na sila sang tyempo kag nagsulod na sa balay bangud nakita nila nga indi na maayo ang sitwasyon.
Natigayon man nila maaresto ang suspek kag natigayon nga maaresto kag makuha ang dala kutsilyo kag martilyo.
Ginpahayag sang pamilya nga problema ang suspek kag may maayo man kuntani nga pangabuhi apang nabuyo sa bisyo gani ginpahalin sang pamilya sa balay.
Suno sa station commander ginabug-usan sang iloy sang suspek, utod kag mga hinablos ang iya nga ginhostage.// Ang suspek ang isa ka 38 anyos kag probationary sa kaso nga illegal possession of firearms.
Sa karun nakahunong na sa Bacolod Police Station 4 kag ginatun-an pa kun ano nga kaso ang pagapangatubangon sini.
