Ginkakibot sang mga residente sang Brgy Molocaboc, ciudad sang Sagay, ang pag-abot sang kapin 50 ka mga indibidwal sa Molocaboc Island nga nagpakilala nga sila ang nagapanag-iya sang isla.
Sa interview sang Bombo Radyo kay Atty Jomax Ortiz, ang Molocaboc Island ang anay may kaso sa tunga sang ciudad kag sang pamilya Lumayno, apang santo sa desisyon sang Korte Suprema, nagdaog ang pamilya Lumayno.
Suno diri, ginkudalan sang pamilya ang 70 hectares nga duta kag gintinguhaan sang barangay kag ciudad nga ma-relocate ang mga residente.
Apang, kahapon sang hapon, ginkakibot sang mga residente sang isla ang pag-abot sang kapin sa 50 ka mga indibidwal nga naka-uniporme sang dark blue nga nagasakay sa pumpboat.
Ila ginguba kag ginpangkakas ang mga kudal nga ginbutang sang pamilya Lumayno kag nagpakilala nga sila ang Maharlika Group kag nagpakita sang dokumento nga sila ang nagapanag-iya sang Molocaboc Island kasubong man sang pila ka mga isla sa Pilipinas.
Suno kay Ortiz, ini man ang ginkakibot sang iya kliyente nga amo ang pamilya Lumayno bangod nga wala sila nakakilala sa grupo nga nagkadto didto.
Dugang pa sini, may yara sang miyembro ang Maharlika group nga yara sa Molocaboc Island.
Pahayag sang abogado, ipalab-ot sini ang natabo sa Philippine National Police, sa militar, kag sa national government para matsekyar kun sin-o ang mga grupo nga nag-claim sang isla.
