BACOLOD CITY — Isa na naman ka Negrense ang nagapangayo sang bulig bangud sang indi maayo nga kahimtangan sini sa iya nga trabaho sa Kuwait.
Nagdangop sa Bombo Radyo Bacolod si Lilibeth Hizon sang Brgy. Cabug ciudad sang Bacolod, pakaisa sang domestic helper nga si Charry Cervantes Deniega, 42 sang Brgy. Binagyuhan, Escalante nga ginapahayag gin-priso sang iya employer sa iya nga kwarto kag indi na makontak tubtob subong.
Nagligad lang nga Disyembre nagpadulong si Cervantes sa Kuwait apang nagareklamo na ini bangud sang tuman kabug-at nga trabaho sa tatlo ka panalgan nga balay sang iya employer, siya lang isa ang nagalimpyo.
Masobra pa sa lima katawo ang ginaserbisyuhan sini.
Suno kay Hizon, masami sila naga-chat sang iya pakaisa kag nakahibalo siya sang kahimtangan sini kun sa diin tinalikdan nga Enero nagpadulong ini sa agency agud magreklamo sang mabug-at nga trabaho kag gin-promisahan lang ini nga buhinan ang iya trabaho kag hatagan sang pag-upod apang wala ini natuman.
Ginareklamo sang OFW ang iya amo nga babaye nga apisar wala siya sini ginapatup-an apang masami siya nga ginasinggitan.
Suno pa kay Hizon bangud sang tuman kabug-at nga obra sa sulod sang balay nagalipungan na ang iya pakaisa.
Sang Sabado, nag-chat ini sa iya nga ginpriso na ini sang iya amo sa iya kwarto kag wala pa sang pagkaon kag tubtob subong indi na makontak.
Si Cervantes ang separado na sa iya bana kag may apat pa ka kabataan.
