BACOLOD CITY — Luyag mahibaluan sang nabilin nga pamilya sang isa ka overseas Filipino worker kun ano ang matuod nga natabo sa iya sa Kuwait nga gintunaan sang iya kamatayon.
Si Josie Perez Lloren, 40-anyos kag tumandok sang Barangay Caliban sa banwa sang Murcia, Negros Occidental ang nagtaliwan sang Pebrero 9.
Nagpauli ini sa Pilipinas sang Enero 26 apang gilayon nga gindala sa Caloocan City Medical Center bangud tuman kaniwang, maluya kag haluson makahambal bangud may bukol ang iya liog.
Sa interview sang Bombo Radyo, ginpahayag sang magulang sang OFW nga si Joel Perez nga cardiorespiratory arrest secondary to cerebrovascular disease ang kabangdanan sang ginkamatay ni Josie.
Nagalaom suno sa iya ang ila pamilya nga mabuligan sang gobyerno agud mahibaluan kun ano ang gindangatan sang iya manghod.
Sang nagligad nga tuig suno sa iya, nakamuno ang OFW nga ginapintasan siya sang misis sang iya amo bangud nagapangimon ini sa iya mister.
Sang nagligad naman nga bulan, nakamuno ini nga kaagahon na siya nagatulog bangud tuman kadamo ang iya trabaho kag wala sa husto nga oras ang iya pagkaon.
Bangud sini, siya ang nagsufrer sang acute ulcer kag tuman kaniwang sang nagbalik sa Pilipinas.
Si Josie ang nagtrabaho sa Kuwait sang tuig 2015 agud mapaeskwela ang tatlo ka mga kabataan matapos ginbayaan sang iya mister.
