Magahugpong ang pila ka traditional jeepney groups sa ciudad sang Bacolod sa pagpatigayon sang duha ka adlaw nga rally protesta.
Ang gintingob nga pwersa ang gintawag Negros United Transport Coalition nga ginalakipan sang Kabakod Negros Transport Coalition Incorporated (KNETCO) – PISTON, United Negros Drivers and Operators Center (UNDOC) – PISTON, Bacolod Alliance for Commuters, Operators and Drivers Incorporated (BACOD) – MANIBELA, grupo sang consolidated jeepneys kag Kilosang Mayo Uno (KMU).
Sa interview sang Bombo Radyo Bacolod kay Kabakod Negros Transport Coalition Inc. President Lilian Sembrano, alas-6:00 bwas sa aga, magatipon ang mga traditional jeepneys sa apat ka rally centers nga ginalakipan sang Libertad Extension malapit sa Bacolod Police Station 6, Bangga Patio sa dalan Burgos, Magsaysay flyover kag Bata flyover.
Ang mga traditional jeepney drivers kag operators ang maga-upod sa kun diin ang rally centers nga malapit sa ila nga routa.
Ala-1:30 tubtob alas-2:00 sila ang magatingob naman sa Bacolod City Government Center (BCGC) para sa pagpadayun sang protesta.
Panindugan ni Sembrano nga sila ang magatulog sa BCGC Ground kun wala sang maga-atubang sa ila nga opisyal.
Sa Huwebes, dala ang ila mga units, sila ang indi maghalin sa BCGC Grounds tubtob indi makapatigayon sang dialogo.
Suno diri luyag nila mabatian kun ano ang tindog sang local government unit (LGU) matapos ang pagbasura ni President Ferdinand ‘Bongbong’ Marcos Jr. sa Senate Resolution nga nagapanawagan sa suspension sang Public Utility Vehicle Modernization Program.
Nagpangayo naman ini sang pasaylo sa mga commuters nga maapektuhan, apang pahanumdom ni Sembrano nga ang ila kawsa ang para man sa mga commuters.
