Dose ka mga miyembro sang New People’s Army (NPA) ang ginpasakaan sang kaso nga murder kag theft may angut sa pagpatay sa apat ka mga pulis sa Ayungon, Negros Oriental sang Hulyo 18.
Suno sa hepe sang Ayungon Municipal Police Station nga si Police Major Rommel Luga, isa mga ginpasakaan sang kaso si Victoriano “Oto” Anadon nga amo ang ginapahayag contact sang mga biktima nga sanday Police Corporal Relebert Beronio, Patrolman Raffy Callao, Patrolman Roel Cabellon, kag Patrolman Marquino de Leon.
Sa 12, anom ang identified, lima ang at-large kag isa ang arestado nga amo si Anadon.
Ginpaathag sang hepe nga nagpasaka man sila sang kaso nga theft batok sa mga suspetsado bangud nadula ang personal belongings sang mga biktima lakip na ang ila issued firearms nga 9mm caliber pistol, 9 magazines, 135 ka mga bala kag lista sang ila target.
Sa dugang nga impormasyon nga nakuha sang Bombo Radyo gin-ako sang Mount Cansermon Command sang NPA ang pagpatay sa apat sa Sitio Ilaya-Yamot, Barangay Mabato, Ayungon.
