BACOLOD CITY — Ginpaanggid sang isa ka overseas Filipino worker sa kainit sang oven ang temperatura sa pungsod Kuwait sa karon.
Sa exclusive interview sang Bombo Radyo sa domestic helper nga si Glenda Espino, ginpahayag sini nga humalin sadtong bulan sang Hulyo, wala na nagpanaog sa 45 degrees Celsius ang temperatura sa Kuwait kun sa diin halos indi na sila maguwa sa balay nga ila ginatrabahuan bangud kaangay nga masunog sila bangud sang tuman kainit.
Suno kay Glenda, mas mainit pa ang dapya sang hangin kun ikumparar sa silak sang adlaw, ilabi na sa kahapunanon tubtob sa kagab-ihon, kag ini ang iya mapaanggid sa kainiton sang bag-ong bukas nga oven.
Sang damlag lang, suno kay Glenda, naglab-ot sa 62 degrees Celsius ang temperatura nga ginkabangdan sang pagkasunod sang mga puno sang palma.
Ang indi normal nga kainiton ang gintunaan naman sang kamatayon sang mga hinuptanan nga idu sa amo nga pungsod.
Ginaabiso naman sang gobyerno sang Kuwait sa mga pumuluyo nga likawan ang pagtiner sa saguwa bangud sang katalagman nga dala sang tuman kainit nga temperatura.
