BACOLOD CITY – Ginapa-dismiss sa serbisyo sang Office of the Ombudsman ang bise alkalde kag pito ka mga empleyado sang banwa sang Valladolid, Negros Occidental.
Sa order nga ginpagwa ni Ombudsman Conchita Carpio-Morales, si vice mayor Romel Yogore, nga nagaserbe pa bilang alkalde sang ginpasaka ang kaso, ang guilty sa kaso nga grave misconduct and dishonesty.
Kaupod sini sanday municipal agriculturist Giovanni Robles kag mga miyembro sang Bids and Awards Committee nga sanday Joseph Alfonso Manayon, Ernesto Genobis, Daisy Galve, Cherryl Aguirre, Merlene Magbanua kag Ramonito Amazona.
Ang nasambit nga kaso ang nag-ugat sa pag-award sang kontrata sadtong tuig 2009 para sa pagpakaayo sang mechanical grain dryers sa isa ka kontraktor nga wala nag-agi sa husto nga bidding kag pagbakal sang binhi sang humay nga wala sang authority nagikan sa Sangguniang Bayan.
Bangud sini, sila ang napamatud-an nga guilty sa paglapas sa Republic Act 7610 (Local Government Code of 1991).
Pananglitan nga wala na ang mga ini sa serbisyo, sila ang magabayad sang multa nga katumbas sang isa ka tuig nga sweldo.
