Patay ang 39-anyos nga lalaki matapos ginluthang sang duha ka gina-alegar miyembro sang makawala nga grupo sa Purok Tuburan, Brgy. Tapi, Kabankalan City, Negros Occidental alas-4:30 kahapon sang hapon, Pebrero 23.
Ginkilala ang biktima nga si alyas Renan, kasado, wala sang trabaho nga residente sang Purok Maghiropay sa nasambit nga barangay samtang ang mga suspetsado naman ang ginkilala nga sanday alyas R-jay, ginabanta naga-edad 30 anyos kag si alyas Makoy nga lunsay residente sang Sitio Tuko, Brgy. Trinidad, Guihulngan City.
Sa inisyal nga impormasyon, ang biktima ang pasakay na kuntani sa iya nga motorsiklo sang may nagpalapit siya nga duha ka persona kag hinali siya nga ginluthang.
Si alyas Renan ang na-igo sa iya nga ulo nga nagresulta sang iya kamatayon.
Nahibaluan nga sang natabo ang insidente, nagpatigayon sang hot pursuit operation ang katapo sang Kabankalan City Police Station sa separado nga kaso sang Pebrero 21 sang sila ang nakabati sang paglupok.
Gilayon naman nga nakapalagyo ang mga suspetsado matapos ang krimen.
Base sa imbestigasyon sang kapulisan, ang mga suspetsado ang gina-alegar miyembro sang makawala nga grupo.
Padayon naman ang hot pursuit operation sang kapulisan sa pagdakop sa mga suspetsado.
