Nagdaog ang Brgy Council sang Brgy Sum-ag, Bacolod City batok kay Engr Andres Tacolod nga nagpatigayon sang construction project sa baba sang Sum-ag River apisar nga wala sang may gina-uyatan nga nagaka-igo nga papeles.
Suno kay City Administrator Atty. Mark Mayo, nga amo ang legal counsel sang Brgy Sum-ag, gindeklarar sang Regional Trial Court (RTC) Branch 44 nga guilty beyond reasonable doubt si Tacolod sa paglapas sang Revised Forestry Code kag Fisheries Code of 1998 nga gin-amendaran sang RA 10654.
Madumduman nga sang tuig 2021, natukiban nga construction works sa Sum-ag river kun sa diin ginpangtapas kag gintabunan ang mga natano nga mangrove.
Sa ginpatigayon nga ocular inspection sa pagpanguna sang Barangay Council kaupod ang Community Environment and Natural Resources Office (CENRO), natukiban nga wala wala sang permit nga gin-secure si Tacolod para sa proyekto.
Sa karun santo sa desisyon sang Korte, ginhatagan sang penalidad si Tacolod nga paglapas sa Foresty Code nga may imprisonment nga duha tubtob sa pito ka tuig, kag paglapas sa Fisheries Code nga may multa nga P80,000 kag P500,000 nga bayad sa kada ektarya kada tuig bilang danyos sa mangroves kag pagkapreso sa sulod sang anum ka bulan tubtob duha ka tuig.
Pahayag ni Mayo, ginhatagan si Tacolod sang 15 ka adlaw para magfile sang motion for reconsideration.
Samtang, ginkalipay naman ni Punong Brgy Rodney Carmona sang Brgy Sum-ag ang desisyon sang Regional Trial Court (RTC) sa kaso batok kay Engr Andres Tacolod.
Suno sa Punong Brgy, luyag niya lamang nga maprotektahan ang area kag mapasiguro nga indi na maliwat ang natabo.
Suno diri, iya ginapasalamatan nga napamatbatan nga guilty si Tacolod kag ang resulta makabig nga kadalag-an para sa Brgy Sum-ag, Bacolod City.
