Nagapanawagan ang Bacolod City Police Office sang kooperasyon sang mga nagapanag-iya sang establishimento ukon mga balay nga may CCTV sa pagsolbar sa kaso sa pagpatay kay Freya Mae Go.
Madumduman nga nasapwan ang bangkay ni Freya sa kahilamunan nga bahin sang Barangay 12, Bacolod City sang Oktubre 22.
Ang kamot sini may higot nga nakakonekta sa iya liog kag wala ini sang pang-idalum nga panapton.
Sa interview sang Bombo Radyo Bacolod kay Police Col. Joeresty Coronica, City Director sang BCPO, 44 ka establishimento kag mga balay ang ginpadal-an nila sang request agud pangayoan sang CCTV footage nga mahimo naka-capture kay Freya kag kun sin-o ang ulihi sini nga kaupod.
Sa 44, 17 lang ang nagkooperar sa ila.
Suno kay Coronica, nakita sa nakuha nga footage nga may isa nga kaupod si Freya nga nagahawig sa isa sa anum ka person of interest.
Apang, blur ang video kag nagalaum sila nga mahimo nacapture pa sang iban nga CCTV ang person of interest apang indi na nila makonekta ang video bangod kulang-kulang ang footage nga may yara sila.
Pahayag ni Coronica, iban sa mga establishimento nagarason nga indi sila makapagwa sang kopya sang CCTV footage bangod kinahanglan pa ang approval halin sa Manila apang pila na ka semana ang naglabay wala sa gihapon sang development sa approval.
Samtang ang iban naman, liwat-liwat nila nga ginabalik apang wala man nagakooperar tubtob nga nadelete na ang recording.
