Ginaplanuhan nga hatagan sang bag-o nga routa ang mga garbage truck padulong sa Bacolod Sanitary Landfill.
Sa interview sang Bombo Radyo Bacolod kay Bacolod City Councilor Homer Bais, chairperson sa Committee on Environment and Ecology, nagpatawag sang dialogo ang Brgy Council sang Brgy Felisa kaupod sa mga pumuluyo kag stakeholders nga para kuntani sa diskusyon angot sa request sang Victorias City nga maghaboy sang basura.
Apang sa pagbawi sang request, gintalakay na lamang nila ang iban pa nga mga isyu, kag nagapanguna diri amo ang reklamo sang mga pumuluyo sa baho sang basura gikan sa nagalabay nga garbage trucks kag mismo ang baho gikan sa landfill.
Nahibaluan nga ang regular nga routa sang mga garbage trucks ang nagalabay sa Elementary kag High School sang Barangay, kasubong man sa Plaza kag Barangay Hall.
Dugang pa nga kun manyaga ukon mamahaw ang mga drivers kag paleros sa mga karenderia, masami nila nga ginapark ang mga garbage truck bisan may unod, nga naga-usbong naman ang baho.
Makapila naman nga nagkanselar sang klase ang mga eskwelahan bangod sa indi ma-agwanta nga baho.
Suno kay Bais, gindangop na niya kay Bacolod City Mayor Greg Gasataya ang concern, kag may-ara na sang pribado nga dalan nga ginalantaw labayan.
Ginaproseso na lamang nga magsugot ang tag-iya agud gikan sa Bacolod Negros Occidental Economic Highway (BANOCEH), sila ang makaderetso na sa sanitary landfill nga wala nagalabay sa residential areas.
Ini ang una naman nga nahimo sang tinalikdan nga kapiestahan sang Barangay.
Suno kay Bais, kinahanglan nga magsunod sang ISWIM Inc sa kontrata sa pagmaintain nga indi magbaho ang landfill, kag dapat man nga limpyuhan ang garbage truck matapos mag-ula sang basura agud indi magpabilin ang baho.
