Suportado sang City Peace and Order Council sa ciudad sang Bacolod ang pagpatukod sang dugang nga lima ka police stations.
Sa interview sang Bombo Radyo Bacolod kay Bacolod City Police Office Director Police Col. Joeresty Coronica, wala sang nagpamalabag sa ginpresent sini nga pagpatukod sang dugang nga lima ka police stations sa meeting nga preside ni Bacolod City Mayor Alfredo Benitez.
Suno kay Coronica, magameeting man sila kaupod ang Bureau of Fire Protection kag Bacolod City Disaster Risk Reduction Management Office bangud ginaplano man nga ang ciudad sang Bacolod ang tungaon sa cluster.
Ini bangud nagaplano man ang ciudad nga magtukod sang building kun sa diin yara na ang PNP; BFP kag CDRRMO kun sa diin ginalantaw ni Coronica nga mahimo mapatuman sa tatlo ukon apat ka areas sa ciudad.
May ara naman sang design sang building kun sa diin mahugpong ang mga talatapan apang ini ang nakadepende sa available nga pondo.
Suno kay Coronica, may-ara sang budget ang BCPO paagi sa pagfacilitate ni Senator Francisco Tolentino nga nagabalor sang P10,561,000 gani bisan ano nga oras sa madason nga tuig mahimo na nga mapatukod ang dugang nga police stations.
Gani, maseparar gid ang PNP building sa BFP kag CDRRMO apang ang importante lamang nga lapitanay ang mga ini.
Ginpahayag man sang BCPO director kun magdecide ang alkalde nga sa Barangay Vista Alegre tukuron ang police station bangud wala pa sang budget, mahimo nga mag-upod ang tatlo ka ahensya sa isa ka building.
Hingyo lamang sini nga kun ang ciudad ang magpatukod sang building, ikonsiderar ang design santo man sa requirement sang PNP kaangay sa kadakuon sang detention facility.
