Ginpaidalom na sa full alert status ang Bacolod City Police Office (BCPO) humalin subong nga adlaw, bilang preparasyon sa pag-abot bwas nanday President Ferdinand ‘Bongbong’ Marcos Jr. kag First Lady Liza Araneta Marcos.
Sa interview sang Bombo Radyo Bacolod kay Police Lt. Col. Ronnie Brillo, Commander sang Bacolod City Mobile Force Company, human na ang security plan sang BCPO.
Nahibaluan nga bwas patigayunon ang Presidential Assistance for Farmers, Fisherfolks and Families (PAFFF) kag ‘Lab for All’ Caravan sang First Lady sa football field sang University of Negros Occidental – Recolletos (UNO-R), apang wala pa matumod kun ano nga oras.
Suno kay Brillo, inkaso nga magchopper ang Presidente sila ang may personnel naman nga magaserbe parameter security sa landing zone.
Kun magabyahe naman pinaagi sa Bacolod-Silay Airport padulong sa ciudad sang Bacolod, may mga motorcycle cops man nga magapanguna sa convoy kag may personnel nga ihamtang bilang road security.
May-ara man sang personnel nga ideploy bilang area perimeter sa palibot sang UNO-R.
Pasalig ni Brillo nga madamo sang level sang security pa ang labyan antes makalab-ot sa Presidente samtang ang in charge naman sa seguridad sini amo ang Presidential Security Group (PSG).
Suno diri, 80 ka police personnel ang ideploy para sa seguridad sang Presidente samtang 50 ka police personnel naman ang sa first lady.
Paathag ni Brillo nga sila ang wala na nagrequest sang augmentation gikan sa Police Regional Office 6, apang kun may engagement pa ang Presidente sa probinsya sang Negros Occidental, ang seguridad sini ang sal-on naman sang Negros Occidental Police Provincial Office (NOCPPO).
Panawagan naman sang mga ini sa kontra administrasyon ukon may mga reklamo nga ipaiway anay ang pagpatigayon sang protesta agud hilway nga matapos ang pagpanagtag sang ayuda kag medical services.
