Ginkumpirmar sang City Director sang Bacolod City Police Office nga may yara sang nagakaigo nga police visibility sa tatlo ka dalagko nga merkado sa ciudad sang Bacolod.
Nahibaluan nga ang Sangguniang Panlungsod sang Bacolod City ang nagapanawagan sa BCPO sa pagpabaskog sang police visibility sa mga merkado sa Bacolod City.
Ini ang ginpasar ni Councilor Celia Flor, chairperson sa Committee on Market.
Una na nga ginpahayag ni Flor nga nakabaton siya sang mga report angot sa mga insidente sang pagpangawat sa mga stalls sa Burgos, Libertad kag Public Market.
Nagala-om ini nga paagi sa pagpasanyog sang police visibility sa mga merkado malikawan ang pagluntad sang nasambit nga krimen kag mas mahapos para sa publiko ang pagpangayo sang bulig.
Sa interview sang Bombo Radyo Bacolod kay Police Col. Joeresty Coronica, may mga kapulisan na nga ginbutang sa mga dalagko nga merkado sang ciudad.
Suno kay Coronica, pila na kabulan nga ang mga kapulisan ang nagapatigayon sang possibility kag ang isa sa mga strategic areas amo ang tatlo kadalagko nga mga merkado.
Samtang agud nga mapadasig ang pagresponde sang mga kapulisan gin-activate man sang BCPO ang Tactical Motorcycle Riding Unit ukon TMRU.
Ang nasambit nga unit ang dako ang mabulig ilabi na sa tion nga may trapiko.
Ang police visibility sa mga merkado ang isa sa mga nakita sang Sangguniang Panlungsod nga tikang agud nga matapna na ang insidente sang pagpangawat sa mga balaligyaan.
