BACOLOD CITY — Dako ang ginsarurot sang benta sang mga manugbaligya sang sigarilyo sa palibot sang ciudad sang Bacolod humalin sang ginpatuman ang nationwide smoking ban nga ginmandu ni Presidente Rodrigo Duterte pinaagi sa isa ka Executive Order.
Nahibaluan nga sa idalom sini, indi sarang nga makapanigarilyo sa publiko nga mga lugar, magluwas lamang kun may yara sang lugar nga gindesignar bilang smoking area.
Sa interview sang Bombo Radyo sa isa sa mga manugbaligya sang sigarilyo sa Bacolod City Public Plaza, ginpahayag sini nga tunga gid sang ila income ang nabuhin bangud tuman kahina ang baklanay.
Kun sang una suno sa iya, makapaubos sila sang isa ka ream ukon pakete, subong binilog nalang ang mabakal sang mga kustomer.
Wala man nagabakal ang mga kalalakin-an kun indi sila makasindi.
Nahibaluan nga subong, nagabakal lamang sang sigarilyo ang mga lalaki kag nagapangita sang lugar sa diin sarang nga makapanigarilyo rason nga ang iban, ginapaiway nalang ang pagbakal.
Samtang, naglab-ot na sa 15 katawo ang nagkaladakpan sang Bacolod Traffic Authority Office (BTAO) angot sa pagpatuman sang smoking ban sa ciudad sang Bacolod.
Sa interview sang Bombo Radyo, ginpahayag ni BTAO Head Police Supt. Luisito Acebuche, 13 sa mga nadakpan ang nagasakay sa publiko nga mga salakyan kag duha naman ang drivers public utility jeepneys.
Ginklaro naman sini nga ang nasambit nga data ang tubtob sadtong Byernes, Hulyo 28, kag wala pa ini sang ihibalo kun nakabayad na sang 500 pesos nga multa ang mga nagkaladakpan.
Apang base sa City Ordinance 641, ginahatagan sang 72 oras ang mga nagabayolar sang ordinansa agud magbayad sang multa kag kun sila ang mapaslawan, sila ang pagapasakaan sang kaso.
Magluwas sa mga drivers kag pasahero sang depasahero nga salakyan, amay poder man ang BTAO sa pagdakop sa mga nagabaligya sang sigarilyo sa sulod sang 100 metros gikan sa eskwelahan.
Samtang, ginpaalinton ni Supt. Acebuche nga bwas nga adlaw, magasapol ini upod kay Councilor Caesar Distrito agud hambalan ang labi nga pagpahugot sang pagpatuman sang smoking ban.
