Ginalantaw nga electrical ignition ang rason sa nagluntad nga sunog sa City Heights Subdivision, Barangay Taculing, Bacolod City pasado alas-4:00 sang kaagahon kahapon.
Napatay sa sunog ang duha ka mag-asawa nga senior citizen nga sanday Edison Hibionada, 80 anyos kag asawa sini nga si Emelyn Hibionada, 81 anyos.
Suno kay Fire Superintendent Jenny Mae Masip, fire marshal sang Bacolod City Fire Station, may yara sila nga narecover nga CCTV footage kag may yara man sang narekord nga video ang kaingod sang mag-asawa sa dash cam sang iya salakyan kun sa diin nakita nga dako na gid ang kalayo sang nagtuyo ini nga magtawag sang bulig sa BFP.
Suno kay Masip, sa ila pagtsekyar sa linya sang kuryente, nakit-an nga madaan na ang mga wire.
Liwat nga ginpahanumdom ni Masip nga indi pagpabay-an ang mga kabataan, senior citizen, kag PWDs nga sila lang sa sulod sang balay bangod sa tion sang emerhensya wala sila sang kasarang nga masalbar ang ila kaugalingon.
Sa karun anum na tanan ang napatay sa sunog sa ciudad sang Bacolod kun sa diin sang bulan sang Mayo duha ka menor de edad ang napatay sa sunog sa brgy, isa ka lapsag kag isa ka 6 anyos ang napatay sa sunog sa brgy Mandalagan kag sa karun duha ka senior citizen naman ang napatay matapos wala makagwa sa ila balay nga nasunog.
