Ginkakibot sang pamilya ni Carl John Arroyo ang pagka-aresto sa iya bangod sa nakuha nga masobra P6 million nga balor sang illegal drugs matapos nga maakisidente sa dalan.
Si Arroyo, 29 anyos, single, ang natumod nga residente sang Purok 42 Bayanihan, Barangay Villamonte, Bacolod City.
Madumduman nga sang Setyembre 7, may nagluntad nga vehicular accident sa Purok Bomba, Barangay Salvacion, Murcia, Negros Occidental, kapin alas- 6:05 sang gab-i.
Samtang nagabyahe si Arroyo sakay sa motosiklo gikan sa San Carlos City padulong sa Bacolod, aksidente nga nabunggoan sini ang isa ka salakyan.
Apang sa pagka-aksidente, isa ka pack sang tunga sa kilo nga shabu ang nag-awas kag nagtupa malapit sa bumper sa likod sang kotse.
Ini man ang rasun kun ngaa kaangay nga nagapanic ang suspect sang maka-abot ang kapulisan.
Sa sulod sang bag ni Arroyo, nakuha ang isa pa ka putos sang tunga sa kilo nga shabu.
Sa interview sang Bombo Radyo kay Wilfredo Arroyo, amay ni Carl John, sang Sabado, nakabaton ini sang tawag nga nadakpan ang iya bata apang naglaum ini nga ang rason ang bangod nga wala ini sang lisenysa sa pagmaneho sang mototrsiklo.
Pag-abot sa Murcia Municipal Police Station, nagpahayag pa ini nga pangitaan sang pamaagi nga makapyansa ang iya bata apang didto na ini ginhambalan nga nakuhaan sang kapin sa isa ka kilo sang suspected shabu si Carl John.
Suno kay Wilfredo, mabuot ang iya bata kag wala ini nakahibalo kun sin-o ang sa likod sini.
Sa karun, nakahunong si Carl John sa Murcia Municipal Police Station kag nagapangatubang na sang kaso nga paglapas sa Section 11 Article 2 sang RA 9165 ukon Comprehensive Dangerous Drugs Act of 2002.
