Tubtob sa karun wala pagid makita ang mangingisda nga namissing sa lawod sang Silay City, Negros Occidental sang Marso 17 sang kaagahon.
Ang biktima nga si Eddie Flores, 38 anyos, residente sang Barangay Punta Taytay, Bacolod City ang nagpadulong sa kadagatan sa boundary sang Talisay kag Silay City upod sa tatlo sini ka abyan nga sanday Marcelo Perez, Joshua Recomono kag Niño Englatera.
Apang sang papauli na, ini ang nahulog bangod sa mabaskog nga pagbalod, kag wala gilayon matalupangdan bangod magahod ang makina sang pump boat.
Sa interview sang Bombo Radyo Bacolod kay Coast Guard Ensign John Hoffer Olis, public information officer sang Philippine Coast Guard Northern Negros Occidental, padayun ang ila nga pagpangita sa namissing kaupod sa Bantay Dagat, lokal nga mangingisda kag iban pa nga mga volunteers.
Sila ang nakalab-ot naman sa pagpangita sa baybayon sang Guimaras kag Dumangas, Iloilo bangod diri padulong ang current.
Padayun man ang pagkoordinar nila sa pamilya sang namissing, kag ang mga ini ang padayun man sang pagpangita apang wala gihapon sang update.
Sa impormasyon sang mga ini gikan sa kaupod sang biktima sa pagpanagat, mabug-at ang panapton nga suksok sang biktima nga mahimo rasun agud nga ini ang wala gilayon naglutaw kun ini ang nalumos.
Apang suno kay Olis, sa ila eksperyensya, bisan mabug-at ang panapton, ang nagakalumos ang nagalutaw gid sa gihapon sa ulihi.
