Nangin malinong kag matawhay ang pagpatigayon sang national rally for peace sang Iglesia ni Cristo sa ciudad sang Bacolod.
Sa interview sang Bombo Radyo Bacolod kay Police Col. Joeresty Coronica, city director sang Bacolod City Police Office, ginabanta nga kapin 35 mil ang ka mga miyembro sang Iglesia ni Cristo nga nagikan sa nagkalain-lain nga bahin sang Negros Occidental, Negros Oriental kag Siquijor ang nagpadulong sa Negros Occidental Capitol Lagoon para sa peace rally.
Suno kay Coronica, 150 ka mga police personnel nagikan sa Bacolod City Police Office kag Bacolod Police Station 2 ang gindeploy agud nga magbantay kag magsiguro sang seguridad sa nasambit nga event.
Wala man sang narekord nga insidente ang mga kapulisan sa Western Visayas kadungan sang pagpatigayon sang national rally for peace sang Iglesia ni Cristo.
Sa interview sang Bombo Radyo Bacolod kay Police Regional Office 6 spokesperson Police Lt Col. Arnel Solis, wala sang untoward incidents nga narekord ang mga kapulisan sa probinsya sang Iloilo kasubong man sa ciudad sang Iloilo.
Suno diri, sa Iloilo ginabanta nga 18 mil ka INC members ang nagtambong sa rally for peace samtang 35 mil naman sa Bacolod City.
Pahayag ni Solis nga sa kabug-usan, nangin malinong kag matawhay ang ginpatigayon nga national rally for peace sang Iglesia ni Cristo kahapon sa Western Visayas.
