Ginsulod sang ginabanta tatlo ka kawatan ang isa ka simbahan sa City Heights Subdivision, Barangay Taculing, Bacolod City.
Sa interview sang Bombo Radyo Bacolod kay Vicenta Arroyo, nagatrabaho sa Holy Family Parish, ginpukaw ini sang Mayor Sakristan kapin alas-3:30 kaina sang kaagahon agud pahibaluon nga bukas ang parish office.
Gilayon man ini nga nagbangon kag nagsunod man ang iya bana, apang sang ginlili sini ang bentana nga nabuhinan na sang duha ka jalousie nga bentana, nakita sini nga naganilapta sa sulod samtang ginrungkab man ang idalom nga bahin sang piyertahan sang opisina.
Bangod sini ginhulat niya nga makabugtaw ang parish priest, nga nag-abiso nga matapos na lamang sang alas-5:00 sang aga nga misa ireport sa kapulisan ang insidente.
Ginalantaw nga sa likod nga bahin sang compound nag-agi ang mga kawatan, kun sa diin may-ara sang sapa.
Gintestingan mismo sang Bombo News Team nga lab-uton ang door knob sa sulod pinaagi sa ginpalos nga mga jalousie apang indi malab-ot, nga mahimo rasun kun ngaa ginrungkab ang dalom nga bahin sang piyertahan.
Suno kay Arroyo, mahimo bata ang ginpasulod bangod indi maka-igo sa ginrungkab nga piyertahan ang adults.
Ginalantaw sini nga gin-isa isa sang kawatan bukas ang mga sobre sa pagpinsar nga may unod, gani ini ang naganilapta.
Ginapakamaayo naman ni Arroyo nga gilayon niya nga ginaremmit sa bangko ang mga nagakabatun nga donasyon kada adlaw.
Apang nadula ang P700 nga personal nga kwarta sini, nga ginsulod sa isa sa mga drawer nga refund sa ginbakal sini nga bulak para sa misa.
