BACOLOD CITY — Ginapasiguro sang isa ka transport group sa Negros Occidental nga wala sang transport strike sa probinsiya kag ciudad sang Bacolod subong nga adlaw, Marso 19.
Ini suno kay Diego Malacad, secretary general sang United Negros Drivers and Operators Center (UNDOC) kasunod sang patigayunon nga untat-byahe sang Pinagkaisang Samahan ng mga Tsuper at Operator Nationwide (PISTON) sa pila ka mga lugar sa Manila agud pamatukan ang modernization program sang gobyerno.
Nahibaluan nga mangin rally center sang PISTON ang Aurora Boulevard sa atubang sang Cubao Elementary School.
May protesta man nga patigayunon sa Alabang Viaduct, Monumento Circle, Novaliches-Bayan kag Anda Circle sa Manila.
Suno kay Malacad, indi sila magpatigayon sang untat-byahe subong nga adlaw bangud nga kadamuan sang mga pampubliko kag pribado nga eskwelahan ang nagapatigayon man sang ila nga eksaminasyon gani indi nila luyag mahul-an ang mga estudyante kag iban pa nga commuters.
Suno sa UNDOC secretary general, magabuylog lamang sila sa untat-byahe sang PISTON pinaagi sa pag-picket sa atubang sang opisina sang Land Transportation Franchising and Regulatory Board (LTFRB) sa ciudad sang Bacolod, alas-10:00 sini nga aga.
