BACOLOD CITY — Walo ka mga balay ang gin kaon sang kalayo sa sunog nga nagluntad sa Purok Sampaguita, Hernaez St. Brgy. 38 ciudad sang Bacolod kagab-i.
Santo sa imbestigasyon ni Senior Fire Officer 2 Archie Españo, duty investigator sang Bureau of Fire Protection (BFP) Bacolod nagsugod ang kalayo sa puluy-an ni Melecio Celis kag nalab-ot man sang kalayo ang puluy-an nga gina-arkilahan sang isa sa mga news writer sang Bombo Radyo Bacolod nga si Bombo Max Padparan.
Lakip man sa nasunog nga mga balay ang gina panag-iyahan nanday Manuel Mendoza Jr., anay punong baranggay sang Brgy. 38, Dan Celis, Miriam Celis, Lolito Ye, Rosalinda Enriquez kag Elias Astrologo.
Lima man ka mga residente ang naka-angkun sang minor nga kapilasan kadungan sang sunog.
Las 8:35 sang nakabaton sang tawag ang BFP Bacolod, las 9:04 gin deklarar nga under control ang kalayo kag las 9:37 sang gin deklarar ini nga fireout.
Suno kay SFO2 Españo ila pa hibaluon kun anu ang gin tunaan sang kalayo bangud madamo sang mga bersyon nga naga-guluha.
Sa pagbanta naman ni SFO2 Españo naga dangat sa 500 mil pesos ang halit nga gin bilin sang sunog.
Nahibaluan nga kalabanan sang nasubog nga balay ang himo sa light materials kag daan na.
