Nag-umpisa na sa paglibot ang Council for Concerned Citizen para tsekyaron ang flood control projects sa ciudad sang Bacolod.
Sa interview sang Bombo Radyo kay Atty. Cesar Beloria, nag-umpisa sila sa pagtsekyar sa flood control structure sa Lupit River kag ginsundan sa Loygoy River, Ngalan River, kag Bakyas Creek.
Suno diri, insakto ang rekord nga may yara sila kag bangod sini ila naman patun-an ang technicality sa structural engineers kga surveyors.
May yara man sila sang nabaton nga mga complaint kag ini ang gamiton nila bilang basehan.
Nagapasalamat ini nga wala sang ghost project sa apat ka area nga ila ginpadulongan.
Sa bahin sang Lupit River, sila magapatigayon sang backtracking agud mahibaluan kun bag-o gid man ang flood control structure nga santo sa report gin-umpisahan ang construction sang 2023 kag natapos sang 2024.
Samtang, ginpahayag ni anay Bacolod City Councilor Atty Renecito Novero nga may yara pa sang kinahanglan nga iverify sa apat ka flood control project nga ginbisitahan sang Council for Concerned Citizen (C-three).
Suno sa abogado nga miyembro sang C-three, ang proyekto sa Lupit River kag Loygoy River isa lang ang contractor nga amo ang Legacy construction apang contractor man sa Lupit River ang MKU construction.
Sa Ngalan River kag Bakyas Creek naman isa man ang contractor nga amo ang C’zarles ukon JVC Tough Core construction.
Ang Lupit River, Bakyas Creek kag Ngalan River may yara sang project cost nga P96,500,000 samtang ang Loygoy River may yara sang project cost nga P91,675,000.
Suno kay Novero ang approved budget for contract yara sa P96,500,000 apang ang approved bidding yara sa P95,500,000 ang budget.
Pahayag sang abogado pagatun-an pa ini bangod magamay lang ang variation nga yara lang sa kapin P1,000,000.
